Taulaga Sapati Muamua mo le Matagaluega o Tusitusiga a le Koneferenisi Aoao

O loo i ai se fa’aupuga lauiloa e fa’apea, “O se matāua o le vaitusi, e mafai ona una’iina ai le miliona o tagata ina ia latou manatunatu i ai.” O tusitusiga lomia, e sili atu le fa’amaoniga na te tauaveina nai lo na o upu tautalagia ona o lona tumau. O lomiga tusitusia e mafai ona umi le taimi tatou te fa’aaluina e faitau ai, i le vave poo le telegese fo’i tatou te manana’o ai, ae e mafai fo’i ona tatou toe fo’i i tua ma manatunatu sili atu ona loloto, i fa’amatalaga o loo tatou sa’ili tatou te a’oa’oina. E fesoasoani ai ia i tatou pe a tatou taumafai e malamalama i mataupu loloto fa’aleagaga.

O lenei tulaga e moni lava i le tala’aga atoa: “O le peni a Luther o se malosi lea, ma o ana tusitusiga, lea na fa’asalalau solo atu, na fafaguina ai le lalolagi. O auala lava nei e mafai ona tatou fa’aaogaina, fa’atasi ai ma fale ua fa’aselau le fa’atuputeleina. O Tusi Paia, o lomiga i le tele o gagana, o loo fa’ailoa atu ai le upu moni mo le taimi lenei, ua i o tatou lima, ma e mafai ona tauaveina atu fa’ata’alise i le lalolagi atoa.” Testimonies for the Church, vol. 6, p. 403.

“E ala atu i a tatou fale lomitusi i sona tulaga tele lava, e tatau ona fa’ataunu’uina ai le galuega a le isi agelu lea e alu ifo mai i le lagi ma le mana tele ma, na te fa’amalamalamaina le laueleele i lona pupula.” – Ibid., vol. 7, p. 140.

I le 1849, na faia ai e James White se fa’asalalauga itiiti na fa’aigoaina o le: O Le Upu Moni Mo Le Taimi Lenei. “O le tama’i fa’aputuga o pepa na folasia i luga o le foloa. Ona si’omia mai lea e le au uso ma tuafafine, ma o loimata i o latou mata na latou aioi ai i le Atua ina ia fa’amanuiaina le tama’i fa’aputuga o pepa a’o sauni e auina ese atu. Ona gaugauina lea o pepa, fusifusia ma fa’atuātusiina, ona aveina lea e James White i maila e valu i le fale meli i Middletown.” – Early Writings,(xxv).

O lenei gaioiga o le tali atu lea i le feau: “ ‘E tatau ona amata ona ē lomia se tama’i pepa ma auina atu i tagata. Ia la’ititi muamua; ma a’o faitau ai tagata, o le a latou lafoina atu ia te oe tupe e lolomi ai, ma o le a fa’amanuiaina i lona ulua’i amataga.’” – Ibid., (xxiv).

O le a le mea e tupu pe si’itia le taugatā o le tau e lafo ai, ma o tulafono o femalagaa’iga i tuaoi o mālō, ua mana’omia ai ituaiga auala e sili atu ona taugatā e tufaina ai nei fa’asalalauga? O a tatou tupe o loo totogi mai e tagata mo a tatou lomiga, e lē o aofia ai nei tupe fa’aalu fou. O lea la, e tatau ona tatou fa’alagolago i le agalelei o ō tatou uso talitonu ina ia fa’ataunu’uina ai le valoaga na fetalaia atu ia James White: “A’o faitau ai tagata, o le a latou auina atu ia te oe tupe.”

Matou te tatalo ina ia pa’i atu i lou loto lenei Taulaga Sapati Muamua mo le Matagaluega o Lomiga o Tusitusiga a le Koneferenisi Aoao, ina ia sili atu lau foa’i mo tagata i le lalolagi atoa o ē o loo mana’omia ina ia latou faitauina le Upu Moni Mo Le Taimi Lenei. Fa’afetai atu ia te outou!

O lo outou au uso i le Matagaluega o Tusitusiga Lomia a le Koneferenisi Aoao