Taulaga Sapati Muamua mo se Fale Tapua’i i Reading, Pennsylvania, USA.

O le Matagaluega i Amerika i Sasa’e (EUSF) ua vaevaeina i vaegā eleele e 8, e fausia i setete o Pennsylvania, New York, Connecticut, Rhode Island, Massachusetts, Maine, Vermont, ma New Hampshire. O le galuega i Pennsylvania o loo fa’atupulaia lona tuputupu a’e i le taimi lenei. O se fua fa’atatau, e ova atu ma le 53% o tagata i lenei setete, o tagata lolotu – e aofia ai Metotisi, tagata lotu Luteru, lotu Papatiso, Penetekoso, ma isi, ae e 28.3% o tagata lotu Katoliko. I ulua’i aso o pulega fa’akolone, o Pennsylvania sa avea o se nofoaga o sulufa’iga mo tagata faimalaga na sa’ilia le sa’olotoga fa’aletapua’iga ina ia sosola ese ai mai i sauāga i Europa. O lenei tala’aga o loo fa’amaonia pea i le taimi lenei i le telē o le fuainumera o tagata talitonu ua fa’aigoaina o tagata Amish, o loo fa’aauau pea ona latou nonofo i fa’aputuga o tagata i fa’ato’aga tetele i le atunu’u o Lancaster, ma oofu i ofu faigofie ma feoa’i i solofanua ma ta’avale solofanua.

I le tele o tausaga, sa nonofo ai ni nai tagata SDARM i Pennsylvania ma sa faia ai fo’i ni koleniga fa’amisionare iinei. Peita’i o le toe fa’atupulaia mai o le naunau i le upu moni mo le taimi lenei, na amata i le 2016 i le aai o Reading ina ua mavae ona si’itia atu i ai tagatā ekalesia e to’a lua mai i New York. O lea tama’i vaega o tagata na fa’ato’ateleina ma amata loa ona latou tapua’i i aoauli uma o Sapati ta’itasi, ma fa’atasi ai i se laufanua (park) i le tau mafanafana, ae tapua’i i le fale o se tasi o tuafafine i le tau malulū. Ina ua mavae ni nai masina o su’esu’ega, e to’atele na papatisoina i totonu o le fa’atuatuaga Toe Fuata’i.

O Reading e sili atu ma le 95,000 le faitau aofa’i o ona tagata ma o se nofoaga tutotonu o falefaigaluega e gaosi ai totoga o masini e fa’aaogaina le eletise, o masini e fa’aaoga i le soifua maloloina, ma masini e teu ai i totonu le eletise ma isi mea fa’apena. O la tatou ekalesia iinei e sili ona telē i totonu o le Matagaluega a Amerika i Sasa'e. E tele isi tagata fou o loo saunia e fa’atasi i tagata o le Atua. I le taimi lenei, o loo matou tapua’i ai i se fale o loo mautotogiina ma matou te manana’o e fa’amausaliina lo matou i ai iinei ma fa’alautele mo tala’iga sili atu. “So’o se nofoaga lava e fa’atula’ia ai se vaega o tagata talitonu, e tatau fo’i ona fausia ai se fale tapua’i. . . . I le tele o nofoaga ua laugaina ai le feau ma ua talia e tagata, o loo latou i ai nei nofoaga i se tulaga fa’atapula’aina, ma e itiiti lava se mea e mafai ona latou faia aga’i i le fa’amausaliina o auala o le a fa’aleleia ai le galuega. O le tele lava o taimi, o lenei tulaga, e fa’afaigatā ai ona fa’alauteleina le galuega.” – Evangelism, p. 376.

Talu ai la ona o lenei tulaga, ua matou ole atu nei i lo tatou au uso ma ē alolofa mai, mai i itu uma o le lalolagi ina ia fesoasoani mai ia i matou i le fausiaina o se fale tapua’i i Reading, ina ia sili atu le tele o tagata e mafai ona aumaia i totonu o le lafu. O lo outou agaga foa’i o le a matuā fa’atāuaina lava, ma o le a fa’amanuia le Atua ia te outou.

O lo outou au uso mai i le Laufanua i Amerika i Sasa’e