Ulua’i Aso
Novema 3
1. FA’ATUATUA MA FA’ATA’ITA’IGA
a. Aisea e matuā aogā ai lava le ola i le loto gatasi atoatoa ma le fa’atuatua o loo tatou ta’utinoina? 1 Korinito 4:9; 1 Ioane 5:3; Iakopo 2:14.
“Aua lava ne’i fa’aseseina e nisi i latou lava i le talitonuga e fa’apea, e mafai ona latou paia a’o latou solia pea ma le loto i ai, se tasi o mana’oga o le Atua. O le faia e le tagata o se agasala o loo ia iloaina, e fa’agūgūina ai le leo o le molimau a le Agaga ma vavaeeseina ai le tagata mai i le Atua.” – The Great Controversy, p. 472.
“O le molimau o le olaga o le tagata, e fa’asilasilaina atu ai i le lalolagi pe na te fa’amaoni i le fa’atuatua o loo ia ta’utinoina. O lau amio e fa’aitiitia ai le tulafono a le Atua i le fua a au uo fa’alelalolagi. E fai atu lau amio ia i latou: ‘E mafai, pe e lē mafai fo’i ona ē usita’i i poloa’iga. Ou te talitonu o le tulafono a le Atua, i se isi uiga, o loo tumau pea i luga o tagata; peita’i, o le mea e sili ona tāua, e lē ma’oti tele le Alii i se tausiga ma’oti o ona fa’atonuga, ma o se solitulafono i nisi o taimi, Na te lē fa’asalaina i se fa’asalaga matuiā.’
“E to’atele tagata o loo latou faia alofaga mo i latou lava mo lo latou solia o le Sapati e ala i lo latou fa’asino atu i a outou fa’ata’ita’iga. Latou te finau mai fa’apea, afai o se tagata e matuā lelei lava na te talitonu o le aso lona fitu o le Sapati lea, e mafai ona ia galue i galuega fa’alelalolagi i lena aso pe a foliga mai, o mea e tutupu e mana’omia ai o ia e faigaluega i lena aso, e mautinoa lava e mafai ona latou faigaluega e aunoa ma le ta’usalaina. E to’atele tagata o le a outou fa’afesaga’i i le aso o le fa’asalaga, ma latou faia ai lou a’afiaga o se alofaga mo lo latou lē usita’i i le tulafono a le Atua. E ui lava o le a lē avea lenei tulaga ma fa’ato’esega mo a latou agasala, ae o le a mata’utia lona i’uga e tete’e ai ia te oe.” – Testimonies for the Church, vol. 4, p. 250.
Aso Gafua
Novema 4
2. O LE LAGI MA LE LALOLAGI O LOO MATAMATA MAI
a. O le a le fa’ata’ita’iga o loo aumaia e Iakopo e fa’aataina mai ai le uiga pepelo lē aogā e aunoa ma ni gaioiga? Iakopo 2:15-17.
“O le lauga e sili ona matagofie e mafai ona laugaina e fa’atatau i le tulafono o Poloa’iga e Sefulu, o le faia lea o Poloa’iga e Sefulu. O le usita’i e tatau ona faia o se tiute o tagata ta’ito’atasi. O le fa’atalalē i lenei tiute o le agasala lea e faia ma le iloa. Ua tu’uina i tatou e le Atua i lalo o matafaioi e lē gata ia mautinoa ai lo tatou mauaina o le lagi, ae ia tatou lagona ai fo’i o se tiute tumau lenei e lē mafai ona sa’oloto mai ai, i le fa’ailoaina atu o le ala i isi, ma, e ala i lo tatou naunau ma lo tatou alofa lē fa’aitu’au, ina ia ta’ita’i atu aga’i ia Keriso i latou e o mai i totonu o le li’o o lo tatou a’afiaga. O le iloga o le leai o se tapula’a e fa’atusalia mai ai olaga o le tele o kerisiano o fa’aupuga, e matuā mata’utia lava le leaga. O lo latou lē amanaia o le tulafono a le Atua, e fa’alotovaivaiina ai i latou o loo iloaina ona mana’oga paia, ma liliueseina ai mai i le upu moni i latou o ē na semanu e taliaina le upu moni.” – Testimonies for the Church, vol. 4, p. 58. [Author’s emphasis.]
b. O le a le uiga moni o le talitonu moni ia Keriso? Iakopo 2:18; Mataio 6:24.
“Ua fetalai le Atua, ma Na te finagalo ina ia usita’i le tagata. Na te lē fesili mai pe fetaui mo ia lona usita’i. O le Alii o le ola ma le mamalu, Na te lē’i fesili pe fetaui mo Ia poo Lona fiafiaga, ina ua Ia tu’ua Lona tulaga mamalu maualuga ina ia avea ai o Ia ma tagata o le fa’anoanoa ma masani ma le tigā, ma Ia taliaina ai le fa’alumaina ma le oti ina ia lavea’iina ai le tagata mai i le i’uga o lona lē usita’i. Na maliu Iesu, e lē’i maliu ina ia lavea’i ai le tagata i totonu o ana agasala, peita’i ina ia lavea’iina ai o ia mai i ana agasala. O le tagata e tatau ona ia tu’ua le sese o ona ala, ina ia mulimuli ai i le fa’ata’ita’iga a Keriso, ‘ia ia tauaveina a’e ai lona satauro ma mulimuli atu ia te Ia, ma fa’afitia ai e ia, ia lava, ma usita’i ai i le Atua i so’o se tau lava. . . .
“Afai o i tatou o auauna moni a le Atua, e lē tatau ona i ai se fesili i totonu o ō tatou mafaufau, pe o le a tatou usita’i i Ana poloa’iga, pe o le a tatou manatunatu muamua i o tatou lava mana’oga fa’alētumau. Afai e lē o tausiaina e le fa’atuatua o tagata e talitonu i le upu moni, i latou lava, i nei aso o loo i ai pea le filemu, o le a se mea o le a fa’atumauina i latou pe a o’o mai le tofotofoga tele ma ua tu’uina mai le poloa’iga e tete’e ai ia i latou uma lava o le a lē ifo i le fa’atagata o le manufeai ma lē taliaina lona fa’ailoga i o latou muaulu poo o latou lima? O lenei vaega taimi mata’utia, e lē o toe mamao ese atu. E aunoa ma le vaivai ma le fa’alotoloto lua o tagata o le Atua, e tatau ona latou fa’apotopotoina mai le malosi ma le loto tele mo le taimi o puapuaga.” – Ibid., pp. 250, 251. [Author’s emphasis.]
Aso Lua
Novema 5
3. A’OA’O MAI IĀ APERAAMO
a. O le a le tulaga mata’utia fa’aleagaga ua lapata’ia ai i tatou? Iakopo 2:19.
“E to’atele latou te ioeina e fa’apea, o Iesu Keriso o Ia o le Fa’aola o le lalolagi, peita’i o le taimi lava lea e tasi, latou te taofieseina ai i latou mai ia te Ia, ma latou lē salamō ai i a latou agasala, ma latou lē taliaina ai Iesu e avea ma o latou Fa’aola ta’ito’atasi. O lo latou fa’atuatua ua na o se ioe lea a le mafaufau ma le filifiliga i le upu moni; peita’i o le upu moni e lē o aumaia i totonu o le loto, ina ia fa’apaiaina ai le tagata ma liua ai le amio.” – Selected Messages, bk. 1, pp. 389, 390.
“Atonu e te talitonu i le upu moni uma lava; ae afai o ona tapula’a e lē o tauaveina i lou olaga, o lau ta’utinoga o le a lē lavea’iina ai oe. O Satani e talitonu fo’i ma gatete. Na te galue fo’i. Ua ia iloa ua pu’upu’u lava lona taimi, ma ua ia alu ifo i lona mana tele ina ia faia ana galuega leaga e tusa ai ma lona fa’atuatua. Peita’i o tagata o loo ta’utino mai o i latou o tagata o le Atua, latou te lē o lagolagoina lo latou fa’atuatua e ala i a latou galuega. Latou te talitonu i le pu’upu’u tele o le taimi, ae latou te taofi mau atu ma le finafinau i mea o lenei lalolagi, e peisea’i o le a tumau pea le lalolagi i se isi afe tausaga e pei ona i ai i le taimi lenei.” – Testimonies for the Church, vol. 2, p. 161.
b. E fa’apefea ona mafai ona fa’amalosia i tatou e ala i le fa’ata’ita’iga a Apera’amo? Roma 4:1-3; Iakopo 2:20-22.
“O Aperaamo na ia talitonu i le Atua. E fa’apefea ona tatou iloa na ia talitonu? O ana galuega na molimau i le amio a lona fa’atuatua, ma o lona fa’atuatua na avea ma amiotonu ia te ia.
“Tatou te mana’omia le fa’atuatua o Aperaamo i o tatou taimi, ina ia fa’amalamalamaina ai le pogisa o loo si’omia maia i tatou, ma punitia ai le pupula matagofie o le la o le alofa o le Atua, ma avilu ai le tupu a’e fa’aleagaga. . . . O tiute ta’itasi uma lava e fa’atinoina, o taulaga ta’itasi uma lava tatou te fa’asatauroina ai i tatou lava i le suafa o Iesu, e aumaia ai se taui e matuā silisili lona tele. I le gaioiga tonu lava o le tiute, e fetalai mai ai le Atua ma foa’i mai Lana fa’amanuiaga.” – The SDA Bible Commentary [E. G. White Comments], vol. 7, p. 936.
“O tagata e ta’uamiotonuina e le fa’atuatua, peita’i e fa’amasinoina ma tauia e tusa ai ma a latou galuega.” – The Signs of the Times, November 20, 1884.
“O le amiotonu a Keriso e aofia ai gaioiga sa’o ma galuega lelei e sau mai i mafua’aga mamā, lē fa’apito.” – Testimonies for the Church, vol. 3, p. 528.
“O le tausiaina o poloa’iga a le Atua e mana’omia ai galuega lelei mai ia i tatou, o le fa’afitia e le tagata o ia lava, o le fa’asatauroina e le tagata o ona lava mana’o, ma le naunau atu mo le lelei o isi, o a tatou galuega lelei e lē mafai ona lavea’iina ai i tatou, peita’i e mautinoa lelei lava e lē mafai ona lavea’iina i tatou e aunoa ma galuega lelei. A uma ona tatou faia mea uma lava e mafai ona tatou faia, ona tatou fa’apea ifo lea: Ua nā ona matou faia lava o lo matou tiute, ma ua na o i matou o ni auauna lē aoga, e lē aogā mo le meaalofa e sili ona itiiti mai i le Atua. O Keriso e tatau ona avea ma a tatou amiotonu ma pale o lo tatou olioliga.” – Ibid., p. 526.
Aso Lulu
Novema 6
4. UPU FA’AMALOSI’AU
a. Fa’amatala pe fa’apefea ona lafoia mai le fa’ata’ita’iga o le olaga o Aperaamo i o tatou lava olaga i le avea o i tatou ma tagata talitonu ia Keriso. Kenese 26:5; Iakopo 2:23, 24.
“O galuega lelei o fua ia o le fa’atuatua. A’o galue le Atua i totonu o le loto, ma gaua’i atu e le tagata lona loto i le Atua, ma galulue fa’atasi ai ma Ia, na te galuea’iina i lona olaga le mea o loo galuea’iina e le Atua i totonu e ala i le Agaga Paia, ma ua i ai le loto gatasi i le va o le sini a le loto ma le fa’atinoga a le olaga. O agasala ta’itasi uma lava e tatau ona lafoa’iina e avea o se mea inosia na fa’asatauroina ai le Alii o le ola ma le mamalu, ma o le tagata talitonu e tatau ona i ai sona iloa aga’iga’i i luma e ala i lona faia i taimi uma lava o galuega a Keriso. O le gaua’i atu o le malosi fai filifiliga o le loto i taimi uma lava, o le usita’i i taimi uma lava, lea e fa’atumauina ai le fa’amanuiaga o le ta’uamiotonuina.
“O i latou ua ta’uamiotonuina i le fa’atuatua, e tatau ona latou maua se loto na te tausia ai le ala o le Alii. O se fa’amaoniga e iloa ai e lē o ta’uamiotonuina se tagata e ala i le fa’atuatua, pe a lē tutusa ana upu ma lana ta’utinoga. Fai mai Iakopo, ‘E te lē iloa ea, na galulue fa’atasi le fa’atuatua ma ana galuega, o galuega fo’i ua fa’aatoatoaina ai le fa’atuatua?’ (Iakopo 2:22).
“O le fa’atuatua lea na te lē fuaina mai galuega lelei, e lē ta’uamiotonuina ai le tagata.” – Selected Messages,bk. 1, p. 397.
b. Aisea e mafai ai ona fa’alototeleina i latou uma lava e molimau atu i tagata fa’apaupau i le taimi lenei, e ala i le fa’amatalaga e fa’atatau ia Ra’ava, le fafine talitane, sa ta’uamiotonuina e le Atua? Iakopo 2:25; Eperu 11:31.
“I totonu o Ieriko amioleaga o le molimau a se fafine fa’apaupau na fa’apea, ‘O Ieova lou Atua, o Ia o le Atua i le lagi i lugā, ma le eleele i lalō.’ Iosua 2:11. O le iloa e fa’atatau ia Ieova lea na fa’apena ona o’o mai ia te ia, na fa’amaonia ai lona fa’aolataga. . . . Ma o lona liuaga e lē o se liuaga uiga ese lea o le alofa tunoa o le Atua i tagata ifo i tupua na ioeina Lana pule fa’aleatua.” – Prophets and Kings, p. 369.
“O i latou uma lava na liliu ese mai i le ifo i tupua aga’i atu i le ifoga i le Atua moni, e fa’apei o Ra’ava le Kanana, ma Ruta le Moapi, na mana’omia ina ia fa’atasi ma Ona tagata filifilia.” – Christ’s Object Lessons, p. 290.
“O se galuega tele lava e tatau ona faia i totonu o a tatou aai, ma o laufanua ua pula uma mo le seleselega. O ō tatou mafaufau o le a vala’auina i itu uma lava, auā o tagata ua salamō i atunuu kerisiano ma atunuu fa’apaupau o le a si’itia a’e o latou leo mo le fesoasoani. E lē tatau ona i ai se vaega itiiti lava e tasi o le si’itiaina a’e e le tagata o ia lava; e tasi lava lou saogalemu o lou talitonu fa’alagolago atu lea i le Atua.” – The General Conference Bulletin, April 1, 1895.
Aso Tofi
Novema 7
5. KI I LE MANUMALO
a. Fa’amatala pe fa’apefea ona tatou maua le manumalo i totonu ia Keriso. Iakopo 2:26; 2 Peteru 1:3, 4.
“E tāua le i ai o le fa’atuatua i totonu ia Iesu, ma ia ē talitonu ua lavea’iina oe e ala ia te Ia; peita’i o loo i ai le lamatiaga i le manatu e fa’apei ona faia e le to’atele i lo latou fai mai fa’apea, ‘Ua lavea’iina a’u.’ E to’atele ua fai mai: ‘E tatau ona ē faia galuega lelei, ma o le a ē ola’; peita’i, a vavae ese mai ia Keriso, e leai se tagata e mafai ona ia faia galuega lelei. E to’atele o loo fai mai i le taimi lenei, ‘Talitonu, e na o lou talitonu lava, ma ē ola ai.’ O le fa’atuatua ma galuega e o fa’atasi, o le talitonu ma le faia ua tu’ufa’atasia. E lē itiiti ifo le mea e mana’omia e le Alii mai i le tagata i le taimi lenei, nai lo le mea na Ia mana’omia mai ia Atamu i totonu o Parataiso a’o le’i pa’ū o ia – o le usita’i atoatoa, amiotonu lē ponā. O le mana’oga o le Atua i lalo o le feagaiga o le alofa tunoa, e matuā lautele lava e fa’apei o le mana’oga na Ia faia i totonu o Parataiso – o le loto gatasi lea ma Lana tulafono, lea e paia, tonu, ma lelei. . . . Aua ne’i fa’aseseina se tasi i le fa’aseseega lea e fiafia i ai le loto fa’alenatura, e fa’apea, o le a talia e le Atua le fa’amaoni, tusa lava poo le a le fa’atuatua, tusa lava poo le a le lē atoatoa o le olaga. E mana’omia e le Atua mai i Lona atalii ma Lona afafine le usita’i atoatoa.
“O le auala e fa’amalieina ai mana’oga o le tulafono, o lo tatou fa’atuatua e tatau ona taofi mau atu i le amiotonu a Keriso, ma taliaina ai e avea ma a tatou amiotonu. E ala i le fa’atasiga ma Keriso, e ala i le taliaina o Lana amiotonu e ala i le fa’atuatua, e mafai ai ona tatou agava’a e galuea’iina galuega a le Atua, ina ia avea ma tagata faigaluega fa’atasi ma Keriso. Afai o loo ē naunau e te tafea fa’atasi ma le galu o le amioleaga, ma e lē galue fa’atasi ai ma meafaigaluega fa’alelagi i le taofia o soligatulafono i totonu o lou aiga, ma totonu o le ekalesia, ina ia mafai ai ona aumaia i totonu le amiotonu e fa’avavau, e lē o ia te oe la le fa’atuatua. O le fa’atuatua e galue i le alofa ma fa’amamāina ai le tagata. E ala atu i le fa’atuatua, e galue ai le Agaga Paia i totonu o le loto ina ia foafoaina ai iina le fa’apaiaina; peita’i o lenei tulaga e lē mafai ona faia se’ivagana o le a galue fa’atasi le meafaigaluega fa’aletagata ma Keriso. . . . O le auala e mafai ai ona tatou maua le amiotonu a Keriso, tatou te mana’omia ina ia tatou liua i aso ta’itasi, e ala i le a’afiaga o le Agaga, ina ia tofusia i le natura fa’aleatua.” – Selected Messages, bk. 1, pp. 373, 374.
Aso Faraile
Novema 8
FESILI TOE FA’AMANATU
1. I lo’u fai mai ou te tausia le tulafono a le Atua, o le a se mea e tatau ona ou iloa e fa’atatau i lo’u a’afiaga?
2. O le a le mea e mana’omia e le Atua mai i kerisiano talitonu?
3. Aisea e masani ai lava ona fa’aigoaina Apera’amo o le tamā o ē fa’atuatua?
4. I le lotolotoi o i latou ou te masani ai, o ai atonu e i’u ina liua e fa’apei o Ra’ava?
5. E fa’apefea ona tatau ona ou maua se olaga ma se iloa fa’akerisiano manumalo?