Roanoke Mati 13, 2020
Mo le au-uso pele ma aiga lotu uma o le ekalesia Aso Fitu o le Toe Afio Mai Toefuataina i le lalolagi atoa,
Ia i ai pea le filemu o lo tatou Alii o Iesu Keriso mo outou uma ta'itoatasi.
Talu ai o lo'o tatou tulimata'i atu pea i le faatupula'ia o le fa'ama'i o le Coronavirus i nai aso ua mavae atu, auā ua latalata atu nei i soo se vaega o le lalolagi. I le avea ai o i tatou ma tagata ekalesia, o lea e mana'omai ai lava ona tatou fa'alauiloaina atu le fa'aleleia atili o le tulaga o le soifua maloloina lelei i totonu o o tatou lava tagata ta'itoatasi ma so'o se tasi o loo tatou feso'ota'i atu i ai.
O le mea lea ua ou manatu ai, ou te fia fa'aaogaina lenei avanoa e tu'uina atu ai se fautuaga e fautuaina ai tagata uma o o tatou aiga lotu ina ia latou faia le mea sili latou te mafaia e puipuia mai ai i le ono fa'aleagaina o i latou ma latou 'aloese mai ai i le fa'asalalauina (pipisi) atu i isi.
I le avea ai o i tatou ma tagata Toefuata'i, e tatau ai lava ona tatou fa'aauauina le fa'aleleia atili o le ola e ala i le toefuata'iina o le soifua maloloina na fa'ailoa mai ia i tatou, e ala i le fa'aleleia o a tatou meaai, ma ia lava le malolo (moe), ma gaioiga faaletino, tumāmā atoa ai ma togafitiga uma fa'ale-soifua maloloina. O le taimi lava tatou te faia ai la tatou vaega, o le ā mafai ai foi ona tatou maua le filemu ma tatou talitonu ai i le tausiga alofa a lo tatou Alii le Atua, ma o le ā Ia lē fa'atagaina lava se mea e tupu ia i tatou e lē tusa ai ma Lona finagalo.
O ai na mafua ai lenei ituaiga fa'ama'i?
"E galue Satani i elemeni po'o le natura o mea ina ia o'o mai ai le fa'afanoga i luga o tagata e le'i faia sa latou sauniuniga....O le Atua o lo'o i ai le puipuiga o Lana fanau ma puipuia i latou mai le mana (malosi) o lē na te faaumatiaina. Auā o le lalolagi Kerisiano ua latou manatu māmā ma inoino i le tulafono a Ieova; ma o le ā auina atu e Ieova le mea ua Ia folafolaina mai o le a Ia faia - o le a Ia aveesea Ana fa'amanuiaga mai le lalolagi ma aveesea mai Lana tausiga mai ia i latou o e fouvale i Lana tulafono ma fa'amalosia isi ina ia latou faia lea lava mea.
"O le a ia (Satani) fa'aali atu i le fanau a tagata ni vavega mata'utia e fa'amaloloina ai ma'i uma, auā o ia lava foi ua pogai mai ai fa'ama'i ma fa'alavelave tutupu, se'ia o'o lava ina fa'atafunaina le tele o aai tetele i le fa'atafunaga. Ua tatou vaaia i le asõ lana galuega. Ua tatou vaaia lana galuega i fa'alavelave tetele ma mala i luga o le sami ma le laueleele, o le tele o fenumia'iga, a asiosio mata'utia ma timuga uato'a, o matagi tetele ma lologa, o afā fulifaõ faapea galulolo ma mafui'e i lea mea ma lea mea, o le afe ma afe o fa'alavelave tutupu i lea nofoaga ma lea nofoaga, ma o nei mea uma ua fa'aalia ai e Satani lona mana (malosi) na te aumaia ai le fa'afanoga i le to'atele o ē e le'i sauni, ona mulimuli mai ai lea o oge ma fa'ama'i ma puapuaga. E luluina e Satani se mea o'ona i le 'ea, ona fano ai lea o le afe ma afe i le fa'ama'i ma le mala. O le a fa'asolosolo ina fa'atupula'ia le tutupu so'o mai o nei mala, ma o le a fa'asolosolo foi ina sili atu lo latou malolosi. O nei mala o le a fa'aauau pea ona i ai i luga o tagata ma meaola e fano ai. 'Ua matutu ma mavaevae le lalolagi, ua atuatuvale foi ta'ita'i o malo. Ua leaga foi le lalolagi i ē o nonofo ai; auā ua latou liliueseina le poloaiga, ua latou solia foi tulafono; ua latou solia le feagaiga e fa'avavau.' Isaia 24:4,5."-GC, p.589.
Liliuina le Loto Mata'u (Fefe) i le Tamā
E ui lava o se taimi o le atuatuvale ma le fefefe o le to'atele, ae o le a mafai lava ona fa'aeaina i luga o tatou ulu ma le olioli tele ona o le mea moni o lo tatou olataga ua sili ona latalata mai nai lo se isi lava taimi:
"Ona iloa ai lea e i latou o le Atalii o le tagata ua sau i ao o le lagi ma le mana ma le mamalu tele. A amata ona tutupu o ia mea, ona ea lea i luga o outou ulu; auā ua latalata ona fa'aolaina o outou." Luka 21:27,28.
E mafai ona tatou fa'aaogaina lenei avanoa e fa'ailoa ma ta'u atu ai ia i latou o lo'o ola i le lē mautonu ma le lē mautinoa e uiga i le lumana'i le fõfõ o fa'afitauli o lo tatou lalolagi ma so'o se fa'afitauli fa'aletagata o le a fa'ata'alise ona vave o'o mai. Ua na'o Iesu lava le fõfõ o fa'afitauli uma o lo'o fesāga'i ma i tatou, ma o le a Ia fa'ataunu'uina Lana folafolaga e ala i Lona toe afio mai i lenei lalolagi ma si'itia atu i latou o ē ua ola ma soifua fa'atasi ma Ia i se lalolagi e sili atu nai lo lenei. E lē o toe umi ona Ia aveina a'e loa lea o i tatou i lo tatou aiga!
O le toe afio mai o Iesu ma le fa'atūina o Lona malo amiotonu ua latalata mai.
Gaioiga Faale-Ekalesia
E tusa ai ma fa'atasiga po'o fa'apotopotoga i totonu o a tatou ekalesia, matou te fa'amalosi'au atu ai i o tatou tagata ina ia fa'aauau pea sauniga e pei lava ona masani ai fa'atasi ai ma le tu'usaunoaina o mataupu e puipuia mai ai ona o popolega, pe afai e talafeagai ai ma lenei mea (ia i latou e sili atu ona faigofie ona a'afia ma sili atu ona mafatia e o'o lava i le oti ona o a'afiaga o lenei vairasi po'o lenei siama) po'o ni nofoaga ua fa'asāina ai e pulega ona fa'apotopotoina ai ona o lamatiaga o le pipisi o lenei fa'ama'i.
O le mea lea e tatau ona tatou usiusita'i i le pule e pei ona fai mai ai, auā o ni meafaigaluega i latou a le Atua pe afai e lē fete'ena'i ma lo tatou usiusita'i i le Atua. 'E tusa ona sili o lo matou anaana i le Atua i lo matou anaana i tagata.' (Roma 13:1; Galuega 5:29).
O lo tatou mulimuli i fa'atonuga e puipuia mai ai i fa'ama'i, o lo tatou tiute faa-Kerisiano
E lē tatau ona tatou manatu ua leai se fa'atuatua ona o le lē fa'apotopoto fa'atasi ma tatou 'aloese mai ai i le tu'uina atu o i tatou fa'atasi ma isi i se tulaga lamatia. Auā e tatau ona tatou fa'atinoina le tausiaina o le malumalu o le Atua i se tulaga sili atu. "Tou te lē iloa ea, o lo outou tino o le malumalu lea o le Agaga Paia ua i totonu ia te outou mai le Atua, e lē toe aiā foi outou ia te outou.?" 1 Korinito 6:19.
Sili atu nai lo lenā, o le a avea ma masalosaloga pe afai o lo'o i ai ni lamatiaga ia i tatou lava. "Ona tali mai ai lea o Iesu ma ua fa'apea atu ia te ia, O lo'o fa'apea le upu, Aua e te tofotofo i le Alii lou Atua." Luka 4:12.
Ia fa'ailoa lo tatou fa'amaoni i lo tatou Tamā Faalelagi, auā pe afai o Lona finagalo lea mo i tatou, e e mafaia lava e Ia ona taofia mai i tatou mai lenei leaga.
E ese'ese uma lava fuafuaga a le Atua mo oe ma so'o se tasi e tusa ai ma lenei tulaga, ma afai ua fa'amaonia ua ia te oe lenei vairasi (siama), ia e manatua e tausia oe e le Atua auā o Ia lava le Foma'i Sili. E alofa o Ia ia te oe auā o le a Ia tauaveina pea oe i Ona aao alofa i tofotofoga uma o lo'o e ui atu ai.
Tau ina ia foa'iina mai e le Atua e ala i Lona alofa tunoa ma Lona alofa mutimutivale ia i tatou le iloa ma le malosi (mana) e faia ai Lona finagalo, ma fa'amamaluina Lona Suafa i mea uma lava.
O la outou uso i le Fa'amoemoe,
Eli Tenorio.